Dir Arena, vol dir Pola: dir bosco Siana, xe squasi lo stesso. Do meraviglie: una dei omini, l'altra dela natura. El bosco Siana in primavera iera la meta dele passegiade fora de cità dei polesani. Par la Pasqua picia, po', el iera el centro dela festa. Quanta gente che andava, piena de borse, i più col caval... de S. Francesco e i materani, za inciucai de vin, cola carossa, col cucer che menava scuriade col s'cioco. Nela «rotonda» iera i chioschi, l'albero dela cucagna, la banda che sonava. 'Torno la cieca dela Madona dele Grazie, banchi e...